Ministri i drejtësisë Ulsi Manja ka deklaruar se harta e re gjyqësore, e propozuar nga KLGJ, nuk do të ketë kthim pas, dhe pas miratimit nga Ministria e Financave, do të dërgohet për ti ‘vënë vulën’ në qeveri.

Manja nuk pranoi që të jepte një reagim konkret në lidhje me paralajmërimin e avokatëve për protestë përpara KLGJ-së, duke thënë se të gjitha këtyre pretendimeve do ti përgjigjet nesër në mbledhjen e Komisionit të Ligjeve, posaçërisht për këtë çështje.

Ulsi Manja: Të gjitha diskutimet mbi hartën kemi lënë një ditë të dedikuar, do të kemi përgjigjet e duhura nesër në Komisionin e Ligjeve. Nesër do të shkojmë në respekt të Komisionit të Ligjeve, pas seancës dëgjimore nesër në Komisionin e ligjeve dhe miratimin nga Ministria e Financave, harta do të shkojë në qeveri për miratim.

Harta e re gjyqësore, e propozuar nga KLGJ, në bashkëpunim të ngushtë me Ministrinë e Drejtësisë, pritet që të reduktojë ndjeshëm numrin e gjyakatave në rang vendi, duke nisur nga ato të shkallës së parë, te lënia e vetëm një gjykate apeli në Tiranë, dhe mbyllja e disa administrativeve.

Kjo hartë është kundërshtuar fort nga avokatët, të cilët shprehen se ky projekt do të sillte mungesën e dhënies së drejtësisë për mijëra qytetarë, dhe do të rriste ndjeshëm kostot e shërbimit.

Prej dy javësh tashmë, dhoma kombëtare e avokatisë ka bojkotuar të gjitha seancat gjyqësore, përfshirë dhe ato për masat e arrestit, duke lënë në kolaps të gjithë punën e gjykatave.

E megjithatë, duket se qeveria nuk ka ndërmend të bëjë hapa pas për këtë çështje, duke e çuar deri në fund hartën e re gjyqësore, që sipas tyre do të rrisë eficencën e institucioneve të drejtësisë.