I vogli Brian Spahiu humbi jetën në moshën 3-vjeçare pas një ndërhyrjes kirurgjikale që iu nënshtrua në një klinikë private dentare.

Ngjarja prej disa ditësh ka tronditur opinionin publik, përpos dhimbjes së madhe që i ka shkaktuar familjarëve të 3-vjeçarit të ndjerë.

Urdhri i Stomatologëve të Shqipërisë ka reaguar për rastin, ku kërkon nga stomatologu që ka kryer mjekimin dentar, të gjitha të dhënat e mjekimit. Ata kërkojnë një komunikim urgjent me stomatologun që ka kryer mjekimin, megjithëse shprehen të revoltuar nga kjo mungesë e informacionit.

Njoftim zyrtar: Urdhri i Stomatologëve të Shqipërisë kërkon publikisht e zyrtarisht nga stomatologu që ka kryer mjekimin dentar, të gjitha të dhënat e mjekimit, perfshirë protokollin e mjekimit që është aplikuar për vogëlushin e ndjerë Brian Spahiu, grafitë para e pas mjekimit etj, sipas kërkesave të Komisionit Disiplinor që është ngritur posaçërisht për këtë çështje. Stomatologu kurues të sigurojë urgjentisht kontaktet me sekretarinë e Rajonit të USSH Tiranë.

Urdhri i Stomatologëve të Shqipërisë nuk ka ende dijeni për emrin e stomatologut që ka kryer ndërhyrjen dentare të vogëlushit dhe është e pashpjegushme dhe penalizuese kjo mungesë e emrit të stomatologut kurues, mosprezenca në media edhe mosparqitja  në zyrat e Urdhrit të Stomatologëve të Shqipërisë.

Brian Spahiu humbi jetën tre ditë pasi mori shërbim dentar në klinikën dentare “Splendent” në Rrugën e Kavajës, e cila ndodhet brenda Spitalit të Zemrës, gjithashtu privat.

Mësohet se më 28 shtator, familjarët kishin dërguar fëmijën tek klinika private për të bërë trajtim të dhëmbëve dhe pastrim nga gurëzat, për shkak të dhimbjes muajt e fundit. Pasi iu bë grafi, prindërve iu tha se duhej proceduar në 14 dhëmbë.