Një i paraburgosur ka ndërruar jetë ditën e sotme në Institucionin e Ekzekutimit të Vendimeve Penale në Shkodër.

Drejtoria e Përgjithshme e Burgjeve njofton se viktima është shtetasi Nicolae Ionnut Erion Deliver, i datëlindjes 23 mars 2005, lindur në Rumani dhe banues në Shkodër. Ai ishte arrestuar më 7 tetor 2024 dhe ishte akomoduar në IEVP Shkodër më 10 tetor 2024, me masë sigurimi “arrest në burg”, për veprat penale “vjedhje me dhunë” dhe “prodhim dhe shitje e narkotikëve”.

Sipas të dhënave paraprake, gjatë paradites së sotme i riu është konstatuar nga personeli i shërbimit duke qëndruar në shtrat, çka ka sjellë njoftimin e menjëhershëm të stafit shëndetësor të institucionit. Pas vlerësimit mjekësor, janë evidentuar parametra jetësorë të ulët dhe është vendosur dërgimi i tij urgjent në spital.

Ai është transportuar me urgjencë drejt Spitalit të Koplikut, ku gjatë rrugës ka marrë ndihmën e parë mjekësore nga stafi shëndetësor. Pavarësisht ndërhyrjes së menjëhershme në urgjencë, mjeku ka konstatuar ndërrimin e jetës së tij.

Autoritetet bëjnë me dije se organet kompetente janë njoftuar menjëherë dhe se po bashkëpunohet për sqarimin e plotë të rrethanave të ngjarjes, në përputhje me procedurat ligjore.

Drejtoria e Përgjithshme e Burgjeve ka deklaruar se mbetet e gatshme të vërë në dispozicion çdo informacion të mëtejshëm, në përputhje me legjislacionin në fuqi.