Komisioni i Disiplinës në Federatën Shqiptare të Futbollit ka bërë publike sot vendimet e marra pas shkeljeve të fundjavës, ku vëmendja më e madhe ishte te incidentet e rënda në ndeshjen Flamurtari-Besa, e zhvilluar në Vlorë dhe e mbyllur me rezultatin 1-2 në favor të kavajasve.

Në përfundim të sfidës, tifozët vlonjatë pushtuan fushën e lojës dhe u përplasën fizikisht me trajnerin kundërshtar, Emiljano Çela, ndaj të cilit u hodhën edhe objekte, përfshirë një karrige, në një nga episodet më të rënda të dhunës në stadiumet shqiptare këtë sezon.

Pavarësisht pritshmërive për një dënim të rreptë, Komisioni ka vendosur një gjobë prej 300.000 lekësh për Flamurtarin, ndërsa 2 ndeshjet e mbetura të sezonit ekipi do t’i zhvillojë pa praninë e tifozëve në stadium.

Përveç kësaj, Tirana dhe Partizani janë ndëshkuar me nga 50.000 lekë gjobë secila, për sjellje të gabuar të tifozëve gjatë ndeshjeve të fundit. Po ashtu, Egnatia dhe Elbasani, që garojnë në Superiore, kanë marrë gjoba për shkelje të ngjashme.

Vendimet e sotme kanë ndezur debat për tolerancën e vazhdueshme ndaj dhunës në futbollin shqiptar, me shumë zëra që kërkojnë masa më të ashpra për të garantuar sigurinë në stadiume dhe për të dhënë një mesazh të qartë kundër dhunës.