Një pikë këmbimi e valutës u grabit në zonën e Unazës së re në Tiranë pak minuta pasi kishte nisur aktivitetin mëngjesin e të shtunës.

Autori dyshohet se ka marrë të paktën 30 mijë euro përmes kërcënimit të punonjëseve.
Ora e kamerave të vëzhgimit tregon 07.06 e 34 sekonda, kur grabitësi i veshur me të zeza, me fytyrën e mbuluar me maskë anti-covid dhe me syze të errëta, futet në ambientet e brendshme të pikës së këmbimit valutor. Agresori shihet teksa nxjerr një pistoletë që nuk dihet nëse është armë e vërtetë apo imituese dhe me shpejtësi hynë në pjesën e banakut ku qëndrojnë punonjëset. Nën kërcënimin e armës kërkon paratë dhe në një moment godet me grusht në shpinë njërën prej punonjëseve.

E gjendur nën kërcënimin e armës, ajo i tregon grabitësit sirtarët ku mbahen paratë. Autori me shpejtësi nis marrjen e kartmonmedhave të cilat i fut në pjesën e brendshme të bluzës teksa kontrollon ngado me armën në dorë. Gjatë kohës që grabitësi merr topat me para, në derën e parë të pikës së këmbimit valutor shfaqet një grua, së cilës, sipas pamjeve të kamerës, njëra prej punonjësve ia bën me shenjë dhe ajo largohet menjëherë. E gjithë skena zgjat rreth 1 minutë e 20 sekonda teksa autori del në ora 07.07 e 58 sekonda, siç tregon kamera e vëzhgimit. Por policia sqaroi se orari i këtij sistemi nuk ishte saktë pasi operatori nuk e kishte përditësuar dhe se njoftimi për ngjarjen është bërë në orën 08.25. Grabitësi u larguar qetësisht nga biznesi dhe me një biçikletë humbi gjurmët nëpër rrugica, por me vete mundi të marrë rreth 30 mijë euro. Për fat të mirë 2 punonjëset nuk u lënduan.
Policia e Tiranës vendosi 5 mijë euro shpërblim për çdo qytetar që mund të japë informacion të vlefshëm për identifikimin e autorit në numrin: 0694110415, duke garantuar anonimatin e plotë.