Më 8 shtator do të nisë zyrtarisht viti i ri shkollor 2025-2026, me shkollat 9-vjeçare dhe të mesme që do të hapin dyert për mijëra nxënës dhe mësues në të gjithë vendin.

Kryeministri Edi Rama ka ndarë pamje nga disa prej 30 shkollave të ndërtuara dhe rikonstruktuara, të cilat do të mirëpresin mbi 8 mijë nxënës e mësues në ditën e parë të shkollës.

“Vijojmë të investojmë për ndërtimin dhe rehabilitimin e objekteve arsimore, shkollave, palestrave e terreneve sportive, për të garantuar të njëjtin standard, kudo në Shqipëri,” – shkruan Rama.

Shkollat e reja dhe të rikonstruktuara janë shpërndarë nga veriu në jug, duke synuar përmirësimin e kushteve të mësimdhënies dhe krijimin e hapësirave moderne për nxënësit.

Ky është një tjetër hap në kuadër të investimeve në arsim, që sipas qeverisë, kanë si qëllim përmirësimin e cilësisë së edukimit dhe krijimin e kushteve bashkëkohore për zhvillimin e aktiviteteve mësimore dhe sportive.