Orët e fundit të merkatos kanë ndezur një “telenovelë” të vërtetë rreth të ardhmes së Edon Zhegrovës. Pas sinjaleve të forta se sulmuesi kosovar do të transferohej te Marseille, klubi i tij Lille ka vendosur të bllokojë marrëveshjen dhe të shqyrtojë një tjetër pistë shumë më të madhe: Juventusin.

Sipas mediave franceze dhe italiane, “Zonja e Vjetër” ka rifutur në lojë emrin e Zhegrovës dhe është gati ta marrë nëse Nico Gonzalez largohet drejt Atletico Madrid. Bianconerët kishin bërë më parë një ofertë prej 12 milionë eurosh plus bonuse, por kjo shumë nuk ka bindur drejtuesit e Lille, të cilët kërkojnë më tepër për kartonin e 25-vjeçarit.

Situata është edhe më e ndërlikuar nga fakti se Zhegrova ka vetëm një vit kontratë me Lille. Për këtë arsye, klubi francez është i prirur ta shesë tani, për të mos e humbur me parametër zero verën e ardhshme.

Orët në vijim pritet të jenë vendimtare, ndërsa vetë lojtari ka shprehur dëshirën për një hap të madh në karrierë. Nëse gjithçka shkon sipas planeve, Zhegrova mund të bëhet shqiptari i parë që vesh fanellën bardhezi të Juventusit.