Një aksident me pasojë vdekjen është shënuar ditën e sotme në qytetin e Vlorës. 96-vjeçari Pandeli Opingari ka ndërruar jetë pasi u përplas nga një automjet tip Audi teksa po kalonte rrugën në vijat e bardha.

Ngjarja ka ndodhur në rrugën “Demokracia”, ku, sipas të dhënave paraprake, drejtuesi i automjetit, një 22-vjeçar me inicialet O. A., ka aksidentuar të moshuarin, banues në Vlorë. Pas përplasjes, 96-vjeçari u transportua me urgjencë në spital, por nuk ka mundur t’u mbijetojë plagëve të marra.

Pandeli Opingari ishte një emër i njohur dhe i respektuar në sportin vlonjat. Ai ka qenë mësues i edukimit fizik, futbollist dhe trajner, duke lënë gjurmë të rëndësishme në historinë e futbollit lokal dhe në edukimin e brezave të rinj.

Policia ndodhet në vendngjarje dhe po vijon veprimet hetimore për të sqaruar rrethanat e plota të aksidentit, ndërsa drejtuesi i mjetit është shoqëruar për veprime të mëtejshme procedurale.