Policia e Vlorës njofton se ka vënë në pranga një 23-vjeçar, i cili akuzohet se ka vrarë të atin, duke i vendosur një sasi lënde plasëse brenda sobës me gaz, duke i marrë jetën.
Bëhet fjalë për ngjarjen e rëndë të ditës së djeshme në Selenicë të Vlorës, ku u raportua se një 56-vjeçar kishte humbur jetën rrugës për spital, pasi ishte lënduar rëndë nga shpërthimi i një bombole.
Më pas, policia reagoi duke sqaruar ngjarjen dhe ku bëri me dije se lëndimet të ndjerit i ishin shkaktuar nga shpërthimi i një lënde plasëse, ndërsa sot zbuloi se bëhet fjalë për një ngjarje të qëllimshme.
Sikurse njofton policia, djali 23-vjeçar i viktimës dhunohej prej kohësh nga ky i fundit, e për pasojë i riu nuk ka duruar më dhe i ka vendosur brenda sobës me gaz, një sasi të konsiderueshme lënde plasëse, e cila ka shpërthyer dhe i ka marrë jetën babait të tij.
Njoftimi i policisë:
“Selenicë, Vlorë/Si rezultat i veprimeve të thelluara hetimore, zbardhet ngjarja e ndodhur mëngjesin e djeshëm, në Selenicë, ku si pasojë e një shpërthimi, humbi jetën shtetasi D. G., 56 vjeç.
Fillimisht u dyshua se ngjarja ishte aksidentale, por hetimet e thelluara profesionale të Policisë, në drejtimin e Prokurorisë, zbardhën vendosjen e lëndës plasëse në sobën me gaz dhe identifikuan autorin e ngjarjes.
Vrau babanë e tij, duke vendosur lëndë eksplozive në sobën me gaz, vihet në pranga 23-vjeçari.
Sekuestrohen mekanizmi elektrik i përdorur për shpërthimin e lëndës plasëse, kallëpe me lëndë plasëse, granata, ndezësa granatash, armë zjarri, municion luftarak dhe sende të tjera të kundërligjshme.
Në vijim të veprimeve të thelluara hetimore për ngjarjen e ndodhur mëngjesin e djeshëm, në territorin e jashtëm të banesës së shtetasit D. G., ngjarje e cila fillimisht u dyshua si aksidentale, grupi hetimor siguroi prova që krijonin dyshime se ngjarja mund të mos ishte aksidentale.
Bazuar në provat e siguruara dhe në veprimet e kryera nga specialistët për Hetimin e Krimeve të Rënda në DVP Vlorë, në drejtimin e Prokurorisë, rezultoi se ngjarja nuk ishte aksidentale, por e qëllimshme.
Si rezultat i veprimeve të thelluara hetimore, u vu në pranga autori i dyshuar, shtetasi M. G., 23 vjeç, djali i 56-vjeçarit që humbi jetën nga shpërthimi në territorin e jashtëm të banesës së tij.
23-vjeçari dyshohet se për shkak të dhunës së vazhdueshme që babai ka ushtruar ndaj tij, ka vendosur lëndë plasëse në sobën me gaz, në oborrin e banesës, nga shpërthimi i së cilës humbi jetën 56-vjeçari.”
