Hetimet për vrasjen e 49-vjeçarit Jani Aliaj në burgun e Koridhalos në Greqi kanë hyrë në një fazë të re, duke hedhur dyshime të forta mbi autorësinë e krimit.

Sipas burimeve policore greke, dyshohet se autor i vrasjes mund të jetë 44-vjeçari nga Tepelena, Xhuliano Halili, i cili ndodhej në të njëjtin sektor dhe në qeli pranë me viktimën. Halili rezulton gjithashtu i plagosur gjatë ngjarjes, një detaj që ka ngritur dyshime të forta te hetuesit.

Fillimisht, përgjegjësinë për vrasjen e mori një i burgosur grek, 27-vjeçari Kristos Vardhuniotis, i cili u vetëdorëzua duke deklaruar: “Ta dini, unë e vrava”. Megjithatë, hetimet paraprake nuk konstatuan shenja përleshjeje, çka bie ndesh me versionin e tij. Në të kundërt, në vendngjarje u gjet i plagosur Halili, i cili ka precedent të rëndë penal, pasi dy vite më parë kishte kryer një tjetër vrasje brenda të njëjtit burg, atë të Alfond Ndocit.

Burime nga komuniteti i burgjeve kanë pohuar se prej ditësh qarkullon versioni se vrasja është kryer nga Halili, ndërsa i burgosuri grek dyshohet se është paguar ose kërcënuar për të marrë përsipër autorësinë. Ky informacion, sipas të njëjtave burime, ka mbërritur tashmë edhe te autoritetet greke, të cilat kanë intensifikuar hetimet.

Ndërkohë, burime të tjera bëjnë me dije se Jani Aliaj dyshohej prej vitesh se ishte përdorur në konfliktet e ashtuquajtura të “mafies greke”. Ai ishte përfolur si ekzekutor në një atentat ndaj një figure të rëndësishme të grupeve kriminale që kontrollojnë jetën e natës në Greqi, megjithëse këto dyshime nuk janë provuar kurrë zyrtarisht.

Hetimet vijojnë, ndërsa autoritetet greke pritet të sqarojnë plotësisht rrethanat dhe autorësinë e vrasjes që ka tronditur burgun e Koridhalos.