Lezhë – Një ngjarje e rëndë ka tronditur fshatin Pllanë këtë pasdite, ku një 65-vjeçar është gjetur i vrarë pranë bregut të lumit Mat. Viktima është identifikuar si Gjergj Tusha, banues në fshatin Pllanë.

Sipas njoftimeve të Policisë, rreth orës 14:40, vajza e të ndjerit raportoi humbjen e kontakteve me babanë e saj. Menjëherë u organizuan kërkime intensive nga shërbimet e Policisë. Trupi i pajetë u gjet rreth orës 17:30, pranë hidrovorit në Talë, duke shfaqur shenja dhune dhe një plagë që dyshohet të jetë nga armë zjarri.

Policia ka ngritur një grup të posaçëm hetimor, i cili, nën drejtimin e Prokurorisë, po punon për sqarimin e rrethanave të ngjarjes dhe identifikimin e autorit/ve. Ndërkohë, Forcat e Policisë dhe Njësia Speciale e Forcës Kombëtare të Sigurisë po kryejnë kontrolle intensive në zonë.

Hetimi vazhdon dhe autorët e mundshëm janë ende të paidentifikuar. Policia kërkon bashkëpunimin e qytetarëve për çdo informacion që mund të ndihmojë në zbardhjen e ngjarjes.