Policia e Shtetit ka konfirmuar arrestimin e 41-vjeçarit Ylber Jaku, i cili është i dyshuari kryesor për vrasjen me armë zjarri të 34-vjeçarit Rushit Sallahu në Has, pas një konflikti të përshkallëzuar për çështje pronësie midis dy familjeve.

Sipas të dhënave zyrtare, ngjarja ka ndodhur rreth orës 16:40, kur Jaku dyshohet se ka qëlluar me armë zjarri mbi Sallahun, duke e lënë të vdekur në makinën e tij. Policia ka sekuestruar armën e dyshuar të krimit dhe ka shoqëruar autorin në komisariat.

Konflikti i rëndë është një vazhdim i një përleshjeje të ndodhur një ditë më parë, kur, sipas burimeve, Ryshyt Sallahu ka goditur nënën e Ylber Jakut, e cila ndodhet ende në gjendje të rëndë në spital. Ngjarja ka ndodhur pas një sherri me shkopinj mes anëtarëve të dy fiseve për shkak të një prone në zonë.

Dyshohet se vrasja ka qenë një akt hakmarrjeje nga ana e 41-vjeçarit, i cili, sipas raportimeve paraprake, ka udhëtuar menjëherë nga Anglia pas plagosjes së prindërve të tij për të marrë pjesë në konflikt.

Ngjarja ka tronditur komunitetin e Hasit dhe ka risjellë në vëmendje përmasat e rrezikshme që marrin konfliktet për pronat në zona të thella rurale, ku zgjidhja përmes drejtësisë ligjore ende has në mungesë besimi.

Policia ka vendosur perimetër sigurie në zonë dhe vijon hetimet për të zbardhur plotësisht rrethanat e kësaj ngjarjeje. Autori do të dalë para gjykatës me akuzën e vrasjes me paramendim dhe armëmbajtjes pa leje.