Policia greke dyshon se trupi i gjetur i djegur në Skourta të Viotias i përket Sulo Astrit Halilit, 27 vjeç, me origjinë nga Beçishti i Tepelenës, i cili ishte shpallur i zhdukur që prej 4 nëntorit.

I riu jetonte në Halkida, ndërsa makina e tij u gjet e braktisur në zonën e Vilias, pranë Athinës, pak ditë pas zhdukjes.

Sipas raportit paraprak të autopsisë, viktima ishte qëlluar me armë zjarri dhe më pas djegur, ndërsa në momentin e gjetjes kishte ende prangat në duar – detaj që forcon dyshimet për një vrasje të mirëorganizuar.

Autoritetet greke po presin rezultatet e ADN-së për të konfirmuar zyrtarisht identitetin e trupit, ndërsa hetimet janë përqendruar në pistën e hakmarrjes ose të një konflikti kriminal.

Burime pranë policisë lokale thanë se po verifikohen kontaktet dhe lëvizjet e fundit të Halilit, si dhe rreth shoqëror i tij në Greqi, ku ai punonte prej disa vitesh.