Presidenti ukrainas, Volodymyr Zelensky, ka falënderuar sot udhëheqësit evropianë pas arritjes së marrëveshjes për financim të mëtejshëm për Ukrainën, e cila ndodhet nën agresionin rus që prej shkurtit të vitit 2022.

Në një reagim në platformën X, Zelensky e cilësoi vendimin si një mbështetje kyçe për vendin e tij. “Kjo është një mbështetje e rëndësishme që vërtet forcon qëndrueshmërinë tonë”, shkroi ai, duke theksuar gjithashtu rëndësinë që asetet ruse të mbeten të palëvizshme dhe që Ukraina të ketë garanci financiare për vitet në vijim.

Pas disa muajsh mosmarrëveshjesh dhe negociatash intensive, shtetet anëtare të Bashkimit Evropian arritën një kompromis në orët e para të mëngjesit për financimin e Ukrainës për dy vitet e ardhshme. Megjithatë, BE-ja nuk ndërmori ende hapin e diskutueshëm të përdorimit të drejtpërdrejtë të aseteve të ngrira ruse.

Sipas marrëveshjes së arritur, Ukraina do të përfitojë një kredi pa interes në vlerën e 90 miliardë eurove. Në rast se Rusia nuk paguan kompensimin për dëmet e shkaktuara nga lufta, asetet ruse të ngrira në Bashkimin Evropian do të përdoren për shlyerjen e kësaj kredie.

Kancelari gjerman, Friedrich Merz, ishte ndër liderët që kishin kërkuar fillimisht përdorimin e drejtpërdrejtë të fondeve të bankës qendrore ruse, të ngrira kryesisht në Belgjikë, për të ofruar kredi deri në 210 miliardë euro për Ukrainën. Megjithatë, kjo ide mbetet ende e debatueshme brenda bllokut evropian.

Marrëveshja e fundit shihet si një hap i rëndësishëm politik dhe financiar në mbështetjen e Ukrainës, në një moment kritik të konfliktit me Rusinë.