Presidenti ukrainas Volodymyr Zelensky ka denoncuar intensifikimin e sulmeve ajrore ruse ndaj Ukrainës, duke deklaruar se vetëm gjatë javës së kaluar janë përdorur mbi 1,180 dronë, 1,360 bomba dhe 10 raketa të llojeve të ndryshme nga forcat ruse.

Në një postim në Facebook, Zelensky tha se “gjatë gjithë natës, ekipet e emergjencës në Kiev po përballeshin me zjarre në ndërtesa apartamentesh dhe makina” si pasojë e sulmeve me dronë Shahed në lagje të banuara. Ai konfirmoi se ka të plagosur mes fëmijëve dhe të rriturve, të cilët kanë marrë ndihmën e parë mjekësore.

Një tjetër incident u shënua në qytetin Cherkasy, ku një konvikt u përfshi nga flakët, ndërsa Kharkiv, Mykolaiv dhe Kiev u goditën gjithashtu nga valë dronësh, kryesisht Shahed të prodhuar në Iran – 165 vetëm gjatë natës së fundit.

Zelensky ironizoi thirrjet e Rusisë për një armëpushim me rastin e 9 majit, Ditës së Fitores, duke e quajtur këtë “cynizëm të nivelit të lartë”. Ai theksoi:

“Rusia godet Ukrainën çdo ditë ndërsa bën thirrje për ndalje zjarri. Ne kemi nevojë për një armëpushim të vërtetë, jo për një manovër propagandistike.”

Kjo deklaratë vjen në një moment kur tensionet ndërkombëtare janë në rritje dhe presioni mbi aktorët diplomatikë për një zgjidhje të qëndrueshme është më i madh se kurrë.