Deputeti i Partisë Demokratike, Belind Këlliçi, ka reaguar lidhur me deklaratat kontradiktore për prodhimin e armëve në Shqipëri, duke vënë përballë qëndrimet e drejtuesve të KAYO-s, përfaqësueses së TIMAK dhe zëvendësministres së Mbrojtjes me ato që, sipas tij, ministri Ermal Nufi ka deklaruar më herët në Kuvend.
Përmes një videoje dhe një reagimi në rrjetet sociale, Këlliçi ka sjellë në vëmendje një intervistë të gazetarit Blendi Fevziu me drejtues të KAYO-s, përfaqësuesen e TIMAK dhe zëvendësministren e Mbrojtjes.
Në video, drejtuesi i KAYO-s, Ardi Veliu, pyetet nëse në Shqipëri prodhohen armë. Përgjigjja e tij është e prerë: “Zero”.
Pikërisht kjo përgjigje është përdorur nga Këlliçi për të ngritur pikëpyetje mbi deklaratat e ministrit Nufi në Kuvend.
Sipas deputetit demokrat, gjatë një interpelance në Kuvend në prill të këtij viti, ministri i Mbrojtjes kishte deklaruar se Shqipëria prodhon armë dhe se ato përdoren aktualisht në vende ku zhvillohen luftëra.
Këlliçi kërkon të sqarohet nëse bëhet fjalë për të njëjtat armë dhe çfarë nënkuptohet konkretisht me “prodhim armësh” në Shqipëri.
Deputeti ngre gjithashtu pyetjen nëse armët për të cilat ka folur ministri janë prodhuar jashtë Shqipërisë dhe më pas vetëm janë ambalazhuar apo trajtuar në vend.
Në reagimin e tij, Këlliçi kërkon që ministri Nufi të japë një sqarim publik për origjinën e armëve, mënyrën e prodhimit të tyre dhe aktivitetin e kompanive që lidhen me këtë sektor.
Ai e konsideron mospërputhjen mes deklaratave një çështje që kërkon transparencë dhe përgjegjësi politike, ndërsa ka kërkuar edhe hetim mbi akuzat e ngritura rreth kësaj çështjeje.
Përplasja politike vjen pas publikimit të një audio-përgjimi nga Arben Ahmetaj, ku janë përmendur edhe emrat e Edi Ramës, Ermal Nufit dhe Ron Yeffet.
Këlliçi ngre edhe një tjetër mundësi, duke e lidhur çështjen me biznesmenin Ron Yeffet.
Sipas deputetit demokrat, nga përgjigjet e drejtuesve të kompanive dhe zyrtarëve të përfshirë del se Shqipëria aktualisht nuk prodhon armë, duke kërkuar që institucionet të sqarojnë mospërputhjen mes këtyre deklaratave dhe asaj që është thënë më herët në Kuvend.
