Një zjarr i përmasave të konsiderueshme ka përfshirë paraditen e sotme vendgrumbullimin e mbetjeve në fshatin Daullas, Bashkia Fier. Flakët kanë përhapur panik në zonë, pasi në hapësirën e djegur ndodheshin edhe një sasi e madhe gomash, të cilat kanë prodhuar tym të dendur dhe ndotës në ajër.

Banorët janë alarmuar, sidomos për faktin se pranë vendit të zjarrit ndodhen varrezat e fshatit. Për fat të mirë, ndërhyrja e shpejtë e shërbimit zjarrfikës ka bërë të mundur izolimin dhe shuarjen e flakëve, duke parandaluar përhapjen e mëtejshme të zjarrit në drejtim të banesave apo monumenteve përreth.

Në vendngjarje ndodhet edhe policia, e cila ka nisur hetimet për të përcaktuar shkaqet e zjarrit dhe nëse ai ka qenë i qëllimshëm apo si pasojë e kushteve atmosferike dhe mbeturinave të djegshme në zonë.

Për shkak të djegies së gomave, e gjithë zona është mbuluar nga tymi i zi, duke krijuar vështirësi në frymëmarrje për banorët përreth dhe duke ngritur shqetësime për ndikimin në shëndetin publik dhe mjedis. Autoritetet vendore u bëjnë thirrje qytetarëve të shmangin qëndrimin e zgjatur në zonë deri në shpërndarjen e plotë të tymit.