Sot, më 10 tetor, shënohet Dita Botërore e Shëndetit Mendor, një ditë dedikuar rritjes së ndërgjegjësimit global dhe mobilizimit të përpjekjeve për mbështetjen e shëndetit mendor.
Organizata e Kombeve të Bashkuara thekson se nuk ka shëndet pa shëndet mendor, duke nxjerrë në pah rëndësinë e mbështetjes psikosociale, veçanërisht për individët e prekur nga emergjencat humanitare. Krizat si fatkeqësitë natyrore, konfliktet dhe emergjencat shëndetësore shkaktojnë shqetësim emocional tek 1 në 5 persona. Mbështetja e mirëqenies mendore jo vetëm shpëton jetë, por ndihmon individët dhe komunitetet të shërohen dhe rindërtohen.
OKB nxit bashkëpunim mes qeverive, ofruesve të shërbimeve shëndetësore dhe sociale, stafit arsimor dhe komuniteteve, për të krijuar një botë ku shëndeti mendor të jetë i vlerësuar, i mbrojtur dhe i aksesueshëm për të gjithë, sidomos për ata që përballen me vështirësi.
Ky 10 tetor rikujton se kujdesi për shëndetin mendor është përgjegjësi e përbashkët dhe prioritet global.
