Policia e Shtetit ka shpallur në kërkim një 25-vjeçar me inicialet E.F., i dyshuar për dhunë ndaj të dashurës së tij, Xhuana Nikolli, e cila ndërroi jetë një ditë më parë në spital pasi kishte konsumuar fostoksinë.

Sipas familjarëve të viktimës, të cilët bënë kallëzim në Komisariatin nr. 2 në Tiranë, i riu ushtronte dhunë ndaj 25-vjeçares nga Shëngjini. Dyshohet se kjo situatë e ka shtyrë të renë të konsumojë lëndën helmuese.

Policia njoftoi se ndaj E.F. janë ngritur dy akuza: “dhunë në familje” dhe “shkaktim i vetëvrasjes”.

“Specialistët për Hetimin e Krimeve të Komisariatit të Policisë Nr. 2 shpallën në kërkim shtetasin E.F., 25 vjeç, pasi dyshohet se ka ushtruar dhunë ndaj të dashurës së tij, veprim që dyshohet se është bërë shkak që shtetasja të konsumojë fostoksinë. Si pasojë, ajo ka humbur jetën në spital,” thuhet në njoftimin e policisë.

Autoritetet bëjnë të ditur se vijon puna për lokalizimin dhe kapjen e të riut, ndërsa hetimet janë në zhvillim për të sqaruar plotësisht rrethanat e ngjarjes.