Pas tre dekadash në arrati, vrasësi i trefishtë Sokol Hoxha është ndaluar në SHBA dhe po përballet me një proces ekstradimi të kërkuar nga Shqipëria dhe Belgjika. Fotoja e siguruar ekskluzivisht nga gazetari i Top Channel, Muhamed Veliu, e tregon Hoxhën, 51 vjeç, pak momente pas arrestimit nga US Marshals më 5 maj në shtetin e Ohios.

Sipas burimeve pranë operacionit të koduar “Globe”, dy vite më parë Interpol Tirana u vu në lëvizje pas një informacioni se Hoxha po vuante një dënim në një burg amerikan për vepra penale të kryera atje. Në mungesë të shenjave të gishtave dhe me vetëm një fotografi të vjetër, identifikimi i tij ka qenë fillimisht i vështirë.

Në operacion janë përfshirë edhe autoritetet britanike, të cilat kishin të dhëna për Hoxhën pas kërkesës së tij për azil në Angli dhe marrjes së një pasaporte britanike, siç raportoi “Daily Telegraph”.

Pas përfundimit të dënimit në SHBA, ai është arrestuar menjëherë nga US Marshals në momentin kur po dilte nga burgu, duke menduar se kishte fituar lirinë.

Sokol Hoxha është shpallur një nga personat më të kërkuar nga Interpol Tirana për një vrasje të dyfishtë në Patos në vitin 1997, për të cilën është dënuar në mungesë me 25 vite burg. Ai akuzohet gjithashtu nga drejtësia belge për vrasjen e një 19-vjeçareje shqiptare në Belgjikë, krim për të cilin është dënuar me burgim të përjetshëm.

Aktualisht, Shqipëria dhe Belgjika po garojnë për ekstradimin e tij, ndërsa sipas burimeve juridike, rrethanat mund të favorizojnë Belgjikën për shkak të statusit të dënimit me burgim të përjetshëm. Ndërkohë, në SHBA ndaj tij po zhvillohet edhe hetim për hyrje të paligjshme dhe përdorim dokumentesh të falsifikuara.