Dhomat e Specializuara të Kosovës pritet të shpallin të mërkurën aktgjykimin në procesin ndaj ish-presidentit të Kosovës, Hashim Thaçi, dhe tre ish-komandantëve të tjerë të lartë të Ushtrisë Çlirimtare të Kosovës (UÇK).

Prokuroria ka kërkuar nga 45 vjet burg për secilin prej të akuzuarve, ndërsa mbrojtja ka kërkuar shpalljen e pafajësisë. Thaçi, 58 vjeç, dhe tre ish-komandantët i mohojnë të gjitha akuzat.

Vendimi në Hagë pritet të nisë në orën 10:00, ndërsa në qytete të ndryshme të Kosovës janë vendosur ekrane të mëdha me numërimin mbrapsht deri në momentin e shpalljes së verdiktit. Të shtunën, mijëra qytetarë morën pjesë në një tubim në Prishtinë, duke kërkuar lirimin e ish-krerëve të UÇK-së.

Thaçi dhe tre ish-komandantët akuzohen për përndjekje, vrasje, torturë dhe zhdukje të detyruar të shqiptarëve dhe serbëve të Kosovës gjatë dhe menjëherë pas luftës së viteve 1998-1999. Sipas Prokurorisë, më shumë se 100 kundërshtarë politikë dhe persona të perceptuar si bashkëpunëtorë të forcave serbe janë vrarë gjatë kësaj periudhe.

Avokatët e Thaçit kanë argumentuar se akuzat janë të pabazuara dhe se nuk ekzistojnë prova që e lidhin drejtpërdrejt ish-presidentin me krimet e pretenduara. Mbrojtja ka kundërshtuar gjithashtu pretendimin se Thaçi kishte kontroll mbi komandantët e tjerë të UÇK-së.

Procesi është ndjekur me vëmendje të madhe në Kosovë. Dhomat e Specializuara, të përbëra nga gjyqtarë dhe juristë ndërkombëtarë, mbeten një institucion i kontestuar në vend. Për shkak të shqetësimeve për frikësimin e dëshmitarëve, një pjesë e dëshmive të Prokurorisë janë zhvilluar me dyer të mbyllura, çka ka ushqyer më tej mosbesimin ndaj gjykatës.

Sipas analistëve të cituar nga Reuters, verdikti mund të ketë pasoja të rëndësishme politike për Kosovën, veçanërisht në marrëdhëniet me Shtetet e Bashkuara dhe vendet e tjera perëndimore.

Një vendim në favor të Thaçit mund të ndikojë në ekuilibrat politikë në Kosovë dhe të forcojë bashkëpunimin me Perëndimin. Në të kundërt, një dënim mund të thellojë distancën politike të krijuar gjatë viteve të fundit.

Tashmë, vëmendja është përqendruar te ora 10:00 e së mërkurës, kur në Hagë pritet të zbardhet vendimi që mund të shënojë një nga momentet më të rëndësishme politike dhe juridike për Kosovën në vitet e fundit.