Presidenti serb, Aleksandër Vuçiç, ka reaguar pas akuzave të qeverisë së Kosovës se sulmi me rreth 15 kilogramë eksploziv ndaj ujësjellësit Ibër-Lepenc në Zubin Potok është orkestruar nga Beogradi. Në një deklaratë për mediat, Vuçiç ka hedhur poshtë çdo lidhje të Serbisë me incidentin, duke theksuar se nuk ka ndërmend të kërkojë falje për diçka që, sipas tij, Serbia nuk ka kryer.

“Pse mendoni se nuk nxitova sot në mëngjes të them se Serbia nuk ka lidhje me shpërthimin në kanalin Ibër-Lepenc? Çfarë, t’i kërkoj falje dikujt? Ata e dinë që ne nuk e bëmë! Nëse vrapoj nëpër mediat botërore për të justifikuar veten, ata do ta interpretojnë si të duan,” u shpreh Vuçiç.

Reagimi i Vuçiç vjen mes tensioneve të larta në veri të Kosovës, ku sulme të përsëritura ndaj infrastrukturës kritike kanë ngritur shqetësime për sigurinë dhe stabilitetin në rajon. Autoritetet e Kosovës e kanë cilësuar incidentin si një akt terrorist dhe kanë akuzuar hapur Serbinë për përfshirje në organizimin dhe ekzekutimin e tij, akuza që Beogradi i ka mohuar.

Kjo deklaratë e Vuçiç ndjek një linjë të qëndrueshme të Beogradit për të mos pranuar përgjegjësinë për incidentet e dhunshme në Kosovë, ndërsa dialogu mes dy vendeve mbetet i pezulluar dhe marrëdhëniet tensionohen më tej.