Shtetasi Namik Paja, i lindur më 5 janar 1951 dhe banues në Berat, ka ndërruar jetë më 9 dhjetor 2024, pranë ambienteve të Qendrës Spitalore Universitare “Nënë Tereza” (QSUT) në Tiranë. Paja ishte i dënuar për veprën penale të “Kundërshtimit të punonjësit të Policisë së Rendit Publik” dhe vuante një masë “shtrim i përkohshëm” të vendosur nga gjykata.

Sipas njoftimit zyrtar, Paja vuante nga disa sëmundje serioze, përfshirë çrregullim bipolar, insuficiencë kardiake, sindromë iskemike të zemrës, hipertension arterial (stad II-III), çrregullime psikotike dhe hernje umbilikale. Gjatë qëndrimit të tij në institucionet e burgjeve, ai ishte shtruar tri herë në Qendrën Shëndetësore të Burgut, ku kishte marrë trajtime mjekësore të përshtatshme.

Ngjarja është raportuar menjëherë tek autoritetet kompetente, përfshirë Prokurorinë, Shërbimin për Çështjet e Brendshme dhe Ankesat (SHKBB) dhe Policinë e Shtetit, të cilat kanë nisur hetimet për të përcaktuar shkaqet e sakta të vdekjes.

Drejtoria e Përgjithshme e Burgjeve ka shprehur ngushëllimet e saj për familjen e të ndjerit. Hetimet vijojnë për të sqaruar rrethanat e ngjarjes dhe për të siguruar që protokollet e trajtimit shëndetësor janë ndjekur sipas rregullave.