Kryeministri i Kosovës, Albin Kurti, ka deklaruar se ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, po mbahen padrejtësisht në Hagë. Gjatë një diskutimi me studentët e Universitetit Amerikan në Kosovë, Kurti theksoi se mbrojtja e tyre duhet të ishte e përbashkët dhe më e fokusuar politikisht, sesa juridikisht.

Kurti shpjegoi se në kushtet aktuale, secili nga ish-krerët e UÇK-së ka avokatin e tij, gjë që krijon rrezikun e përçarjes mes tyre, pasi avokatët përpiqen kryesisht të lirojnë klientin e tyre pa marrë parasysh interesin kolektiv.

“Unë kam provuar, kur ky proces kishte nisur, kam provuar që krejt këshillin e mbrojtjes t’i bëjë bashkë, sepse unë besoj që mbrojta për Hashim Thaçin, Kadri Veselin, Jakup Krasniqin dhe Rexhep Selimin do të duhej të kishte qenë e bashkuar. Do të duhej ta kishin pasur një mbrojtje, e jo katër, e jo që secili ta kenë të tyrin”

“Mbrojtja e tyre nuk është vetëm juridike, është politike,” tha Kurti, duke theksuar se përballja me akuzat për krime lufte kërkon një qasje që promovon dhe mbron historinë dhe të vërtetën mbi luftën çlirimtare të Kosovës.

Në fjalën e tij, ai theksoi se është përpjekur ta unifikojë ekipin mbrojtës, por kjo nuk ka ndodhur. Për më tepër, Kurti vuri në dukje se mënyra aktuale e mbrojtjes mund të çojë deri në fajësimin e njëri-tjetrit, duke dëmtuar kauzën e përbashkët.

Ky qëndrim vjen në një kohë kur Dhomat e Specializuara të Kosovës në Hagë kanë ngritur një aktakuzë të re kundër Thaçit për pengim të drejtësisë, duke e bërë situatën edhe më të tensionuar për katër ish-krerët e UÇK-së.