Aktori Gent Hazizi ka ndarë për herë të parë me publikun ngjarjen tragjike që ka shënjuar jetën e tij, vetëvrasjen e të vëllait. I ftuar në emisionin “Një gotë Rose”, Hazizi hapi zemrën dhe foli për këtë dhimbje të thellë që ka mbajtur brenda për shumë vite.

Ai tha se tragjedia ka ndodhur kur ai ka qenë vetëm 5 vjeç dhe se i vëllai kishte mbyllur jetën me dorën e tij. Për të përballuar dhimbjen, prindërit vendosën ta dërgojnë në shkollë më herët, në përpjekje për ta ndihmuar ta harronte ngjarjen. Megjithatë, Genti tregon se mban mend çdo detaj të asaj dite, pasi ka qenë dëshmitar i asaj ngjarjeje tragjike.

“Kam gjithmonë fotografi, me vëllain tim të shtrirë… që kishte një litar gjaku dhe më dukej sikur po t’ia hiqja do t’ia shkurtoja”, ka thënë aktori. Ai shtoi se ka jetuar me mendimin që ai vetë ka vdekur atë ditë, dhe se çdo gjë e ka perceptuar ndryshe pas ngjarjes.

Sipas Hazizit, një moment i rëndësishëm në procesin e tij të shërimit erdhi pas një këshille të marrë nga zysha e tij në Itali, e cila e ndihmoi ta falte vëllain dhe të mbyllte atë kapitull të dhimbshëm të jetës së tij. Pas shumë viteve, ai mundi të gjejë paqe dhe të lërë pas atë ngjarje tragjike.