Në zgjedhjet presidenciale që do të mbahen më 29 dhjetor në Kroaci, do të garojnë tetë kandidatë. Komisioni Shtetëror Zgjedhor (DIP) i Kroacisë ka bërë një deklaratë zyrtare lidhur me zgjedhjet presidenciale, duke konfirmuar se të gjithë kandidatët kanë plotësuar kriteret e nevojshme për të marrë pjesë në këtë garë.

Mes kandidatëve është edhe presidenti aktual Zoran Milanoviç, i cili mbështetet nga Partia Social-demokrate (SDP), ndërsa Unioni Demokratik Kroat (HDZ), i qendrës së djathtë dhe partia në pushtet, ka propozuar ish-ministrin e Arsimit, Dragan Primorac.

Po ashtu, ndër kandidatët që do të marrin pjesë në zgjedhje janë edhe Ivana Kekin nga aleanca “Mundemi”, Miro Bulj nga aleanca “Ura”, Branka Lozo nga partia “Atdheu” dhe “Tubimi Kombëtar”, si dhe kandidatët e pavarur Niko Tokiç Kartelo, Marija Selak Raspudiç dhe Tomislav Jonjiç.

Sipas sondazheve të fundit të zhvilluara në Kroaci, Milanoviç dhe Primorac janë të mundshëm për të kaluar në raundin e dytë të zgjedhjeve. Milanoviç, që ka pasur përballje të ashpra me HDZ-në dhe kryeministrin Andrej Plenkoviç, është shprehur se “Plenkoviç, ne e dimë se ju përbëni kërcënim për demokracinë e vendit. Që nga tani lamtumirë edhe emrit që keni paraqitur për kandidat”. Nga ana tjetër, Primorac ka theksuar se nuk dëshiron të takohet me Milanoviçin për shkak të retorikës së ashpër të shumë liderëve të BE-së.

Një tjetër kandidat që tërheq vëmendjen është Ivana Kekin, e cila është bashkëshortja e një prej anëtarëve të një grupi muzikor në Kroaci.

Nëse asnjë kandidat nuk arrin të fitojë më shumë se 50 përqind të votave në raundin e parë të zgjedhjeve, dy kandidatët që do të marrin më shumë vota do të kalojnë në raundin e dytë, i cili do të mbahet më 12 janar. Rezultatet e para jozyrtare të zgjedhjeve pritet të shpallen natën e 29 dhjetorit.

Zgjedhjet presidenciale në Kroaci mbahen çdo pesë vjet dhe një individ mund të ushtrojë detyrën e presidentit jo më shumë se dy mandate.