Policia holandeze ka sekuestruar një sasi të madhe lënde narkotike të llojit kokainë, e cila ishte fshehur në dy arkivole. Lënda narkotike u kap në zonën jugore të Numansdorp, pasi policia ndaloi një furgon, shoferi i të cilit po sillej në mënyrë të dyshimtë.

Gjatë hetimeve, shoferi tha se po transportonte dy trupa të pajetë në arkivole, por dokumentet që ai kishte me vete nuk korrespondonin me atë që po transportohej. Furgoni u shoqërua në një agjenci ku, pasi u hapën arkivolat, u gjetën çanta të mbushura me kokainë. Pas peshimit, rezultoi se sasia e kokainës ishte 250 kg.

Autoritetet holandeze kanë vlerësuar se, nëse kjo lënde narkotike do të kishte dalë në treg, ajo mund të kishte arritur vlerën e 13 milionë eurove. Policia po heton ngjarjen dhe përpjekjet për identifikimin e personave të përfshirë vazhdojnë.