Policia e Korçës ka finalizuar me sukses operacionin e koduar “Koordinimi”, duke goditur një rast të shpërndarjes së kokainës në doza dhe duke arrestuar katër persona, përfshirë një shtetas turk. Operacioni, i realizuar nga Sektori Kundër Narkotikëve në bashkëpunim me Seksionin për Hetimin e Trafiqeve të Paligjshme në DVP Tiranë dhe Komisariatin e Policisë Kavajë, solli sekuestrimin e kokainës, armëve dhe një sasie parash.
Në kuadër të hetimeve, shërbimet e Policisë morën informacion operativ për disa shtetas nga Rrogozhina që dyshoheshin se po transportonin lëndë narkotike në drejtim të Korçës. Pas informacionit të marrë nga Seksioni për Hetimin e Trafiqeve të Paligjshme në DVP Tiranë, që lidhej me një automjet me targa të huaja, i shpallur alert nga Interpol Roma, policia organizoi një operacion të shpejtë dhe efikas.
Në hyrje të qytetit të Korçës, u ndalua një automjet tip Benz me targa të huaja, i drejtuar nga shtetasi A. D. Ky automjet kishte brenda tre shtetas të tjerë, përfshirë një shtetas turk dhe një shtetase të mitur 17 vjeçe. Gjatë kontrollit, policia sekuestruar 57 gramë kokainë, një shumë parash rreth 9000 euro, dhe më vonë, gjatë kontrolleve në banesat e dy shtetasve në Rrogozhinë, u gjet dhe një armë zjarri pistoletë.
Në përfundim të operacionit, u arrestuan shtetasit: A. D., 40 vjeç, banues në Rrogozhinë, për veprat penale “Prodhimi dhe shitja e narkotikëve” dhe “Trafikimi i mjeteve motorike”; O. Ç., 44 vjeç, shtetas turk, për “Prodhim dhe shitje të narkotikëve” dhe “Prodhimi dhe mbajtja pa leje e armëve”; E. Xh., 34 vjeç, dhe një 17-vjeçare për “Prodhimin dhe shitjen e narkotikëve”. Po ashtu, është proceduar penalisht edhe shtetasi G. K., 20 vjeç, për “Prodhimin dhe shitjen e narkotikëve”.
Prokuroria ka marrë përsipër hetimet dhe po vijon punën për dokumentimin e plotë ligjor të këtij rasti. Materialet procedurale janë dorëzuar për veprime të mëtejshme.
