Shqipëria do të jetë pritësja e “Grande Partenza” së Giro d’Italia në maj të vitit 2025, duke shënuar një moment historik për sportin dhe turizmin shqiptar. Ky event prestigjioz, i ndjekur nga më shumë se 800 milionë shikues në 200 vende të botës, është përmendur gjerësisht në mediat ndërkombëtare, përfshirë edhe Sky Sport.

Etapa e parë do të nisë nga Durrësi më 9 maj, dhe do të përfshijë një rrugë të vështirë malore me 1800 metra disnivel dhe një gjatësi prej 164 kilometrash deri në Tiranë. Rruga përfshin një GPM të kategorisë së dytë pas 70 kilometrash, me një ngjitje prej 13.5 km dhe një pjerrësi mesatare prej 5.2% (11% në pjesën më të pjerrët). Etapa do të përfundojë me një circuit final prej 22 km, që përfshin dy herë një ngjitje të shkurtër përpara një sprinti përfundimtar.

Kryeministri Edi Rama u shpreh në një postim në rrjetet sociale:
“Mirëmëngjes dhe me lajmin se ‘Nisja e Madhe – Grande Partenza’ e Giro d’Italia nga Shqipëria, majin e ardhshëm (një nga evenimentet sportive më të ndjekura në botë, me mbi 800 milionë shikues përmes ekraneve në 200 vende të botës), është publikuar në 70 shtete të ndryshme nga 700 burime informacioni, uroj ta keni sa më të paqtë këtë javë të fundit të vitit.”

Ky event pritet të ketë një ndikim të madh në promovimin ndërkombëtar të Shqipërisë si një destinacion turistik dhe sportiv, duke sjellë përfitime të konsiderueshme ekonomike dhe kulturore për vendin.