Një ngjarje pozitive ka ndodhur mbrëmjen e djeshme në qendrën tregtare TEG, ku Policia e Shtetit, në bashkëpunim me stafin e sigurisë së qendrës, kanë dorëzuar një çantë me 27,000 euro qytetarit që e kishte harruar aty.

Rreth orës 23:00, stafi i sigurisë së TEG ka dorëzuar në njësinë e Patrullës së Policisë së zonës një çantë supi të gjetur në ambientet e qendrës. Pas verifikimeve të kryera nga Policia, është identifikuar pronari i çantës, i cili më pas është kontaktuar dhe i është dorëzuar sendi me të gjitha vlerat monetare dhe sendet personale brenda saj.

Qytetari ka shprehur mirënjohjen për Policinë dhe stafin e sigurisë së TEG për profesionalizmin dhe korrektësinë e treguar në këtë rast.

Policia e Shtetit apelon për vigjilencë dhe bashkëpunim të vazhdueshëm me qytetarët për të garantuar sigurinë dhe integritetin e pronës së tyre.