Shqipëria është renditur nga tabloidi gjerman “Bild” si një nga destinacionet kryesore për të udhëtuar gjatë vitit 2025. Në një artikull të publikuar së fundmi, revista njofton se Shqipëria nuk është më një destinacion i panjohur, por ka arritur të bëhet një vend trend për ata që kërkojnë diell dhe plazhe të bukura. Pjesa më e theksuar e artikullit përfshin Rivierën Shqiptare, e cila është përshkruar me ujërat e saj kristaltë, gjiret e vogla dhe fshatrat bregdetare të mrekullueshëm si Ksamil dhe Himara. “Ndryshe nga rajonet e mbipopulluara të Mesdheut, Shqipëria ofron plazhe të qeta dhe mundësinë për të shijuar natyrën”, shkruhet në artikull.

Ky artikull është cilësuar nga kryeministri Edi Rama si një “superpromovim ndërkombëtar mediatik” për Shqipërinë. Ai theksoi se deri në nëntor të vitit 2024, 356 mijë vizitorë nga Gjermania kishin vizituar Shqipërinë, një shifër që tregon rritjen e interesit për turizmin shqiptar. Rama gjithashtu njoftoi se Shqipëria është duke u përgatitur për të marrë pjesë në ITB Berlin 2025, panairin më të madh në botë për turizmin, ku do të ketë mundësinë të prezantohet para një audiencë globale.

ITB (International Travel Trade Show) është ekspozita kryesore e industrisë së udhëtimeve dhe ofron mundësi të shkëlqyera për të mësuar mbi vendet dhe rajonet e ndryshme të botës, duke u bërë një mundësi ideale për Shqipërinë për të forcuar pozitat e saj në tregun turistik ndërkombëtar.