Autoritetet italiane, përmes Drejtorisë së Antimafias së Bolonjës, kanë shkatërruar një rrjet ndërkombëtar narkotrafiku me pjesëmarrje italo-shqiptare. Operacioni, i zhvilluar në rajonin e Emilia-Romagna, çoi në arrestimin e 15 personave, nga të cilët 12 janë vendosur në masën “arrest në burg” dhe 3 në “arrest shtëpie”. Pesë prej tyre rezultojnë të banojnë në provincën e Reggio Emilia.

Hetimi, i cili filloi në vitin 2020, ka zbuluar një sistem të sofistikuar të importit dhe shpërndarjes së lëndëve narkotike, që përfshinte vendet si Shqipëria, Kosova, Ekuadori, Kolumbia dhe Holanda. Organizata kriminale akuzohet për menaxhimin e sasisë së konsiderueshme të drogës: mbi 23 kilogramë kokainë, 6 kg heroinë, 80 kg hashash dhe 240 kg marihuanë, me një vlerë tregu që kap shifrën e 8 milionë eurove. Gjithashtu, u sekuestruan sasi të mëdha valute në euro cash.

Rrjeti kishte shtrirje të gjerë në territorin italian, duke lidhur rajone si Emilia-Romagna, Lazio dhe Kalabri, ndërsa disa nga anëtarët kishin lidhje të drejtpërdrejta me organizatën mafioze ‘Ndrangheta’ dhe grupe të tjera kriminale.

Operacioni u bë i mundur falë një hetimi të thelluar, i bazuar në Urdhrin Evropian të Hetimit (OIE), dhe përfshiu bashkëpunimin mes forcave policore franceze, holandeze dhe belge. Hetuesit përdorën platformën e koduar të komunikimit SKYECC për të dekriptuar miliona mesazhe me interes hetimor, të shkëmbyera midis anëtarëve të rrjetit.

Përveç trafikut të drogës, hetimi zbuloi transaksione financiare të mëdha, përfshirë transferime me vlerë deri në 5 milionë euro dhe shkëmbime cash deri në 500 mijë euro midis grupeve kriminale.

Operacioni përfaqëson një goditje të rëndësishme ndaj krimit të organizuar dhe përforcon bashkëpunimin ndërkombëtar në luftën kundër trafikut të drogës.