Kreu i Lëvizjes “Shqipëria Bëhet”, Adriatik Lapaj, ka reaguar në lidhje me ngjarjen e rëndë ku një punonjës i Policisë së Qarkullimit Rrugor dyshohet se është vetëhedhur nga një pallat, pasi më herët kishte ndaluar djalin e biznesmenit Samir Mane.
Në një deklaratë publike, Lapaj shpreh shqetësimin e tij mbi rrethanat e këtij incidenti, duke kërkuar nga Policia e Shtetit një raport të plotë dhe transparencë mbi ngjarjen.
“Në fillim u duk si një lajm klikimesh, por kur gazetarja Klodiana Lala konfirmoi se polici, A.S., ishte pjesë e grupit që ndaloi djalin e biznesmenit Samir Mane, pasi ky i fundit kishte përplasur disa mjete dhe kishte kundërshtuar testin e alkoolit, lind dyshimi i arsyeshëm për çdo qytetar. Më pas, polici është thirrur nga AMP dhe, sipas gazetares, i është kërkuar llogari për veprimet e tij”, shkruan Lapaj.
Ai thekson se e ka njohur personalisht punonjësin e policisë dhe e cilëson atë si një nga njerëzit më korrekt dhe që nderon uniformën e Policisë së Shtetit.
“Policia e Shtetit duhet të sqarojë qartë opinionin publik për këtë ngjarje. A ka lidhje mes faktit të raportuar nga gazetarja Lala dhe ngjarjes ku u plagos punonjësi i policisë? Transparenca është e domosdoshme për të shmangur çdo dyshim mbi presionet dhe ndikimet e mundshme ndaj punës së efektivëve të Policisë së Shtetit”, vijon Lapaj.
https://www.facebook.com/share/1BjTj24msZ/?mibextid=wwXIfr
Në përfundim, ai garanton mbështetje për çdo punonjës policie që ushtron detyrën me ndershmëri dhe profesionalizëm, duke theksuar se të gjithë qytetarët duhet të trajtohen njësoj përpara ligjit, pavarësisht statusit të tyre.
Ngjarja mbetet ende e paqartë dhe pritet një reagim zyrtar nga Policia e Shtetit.
