Një video e zëvendëskryeministrit dhe ministrit të Bujqësisë në Kroaci, Josip Dabro, po bën xhiron e rrjeteve sociale, ku ai shihet duke gjuajtur nëntë herë me një pistoletë HS-2000 nga xhami i dritares së një makine private.

Në pamjet e publikuara, Dabro ndodhet në vendin e pasagjerit, i veshur në mënyrë të rastësishme me pantallona të shkurtra dhe një fanellë, duke sugjeruar se videoja mund të jetë regjistruar gjatë verës. Në sfond dëgjohet kënga popullore “Karanfil se na put sprema” nga Zehra Bajraktareviq, ndërsa ai qëllon jashtë makinës në një zonë që duket pranë një vendbanimi.

“Vetëm për vëllain tim Mario”, dëgjohet të thotë Dabro, përpara se të qëllojë me armë. Pas të shtënave, ai nis të këndojë, ndërsa në fund të videos vendos pistoletën në ndarjen pranë vendit të pasagjerit dhe thotë: “Përshëndetje, vëlla Mario, natën e mirë.”

Reagimi i autoriteteve kroate

Pas publikimit të videos, autoritetet kroate kanë nisur një hetim për rastin. Josip Dabro ka deklaruar se videoja është realizuar përpara se ai të merrte detyrën si ministër, por qeveria kroate ka reaguar ashpër ndaj ngjarjes.

“Ne e konsiderojmë të papërshtatshme dhe të papërgjegjshme këtë sjellje dhe përdorimin e armëve të zjarrit. Këtë do ta diskutojmë me zotin Dabro. Autoritetet kompetente do të kryejnë veprimet e përcaktuara me ligj për të përcaktuar të gjitha rrethanat e këtij rasti”, thuhet në deklaratën zyrtare të qeverisë kroate.

Ngjarja ka shkaktuar reagime të shumta në opinionin publik, ndërsa pritet që hetimi të përcaktojë nëse ka pasur ndonjë shkelje ligjore nga ana e ministrit kroat.