Qindra mijëra studentë dhe qytetarë dolën në rrugët e Beogradit të premten (17 janar), duke protestuar para studiove të Radios dhe Televizionit të Serbisë (RTS). Demonstruesit kërkuan llogaridhënie nga presidenti Aleksandar Vuçiç dhe qeveria serbe për tragjedinë në stacionin e trenit të Novi Sadit, ku humbën jetën 14 persona pas shembjes së një çatie.

Çfarë kërkojnë protestuesit?

•Drejtësi dhe transparencë për tragjedinë në Novi Sad.
•Pasqyrim objektiv të ngjarjeve nga mediat shtetërore, pa manipulime dhe propagandë.
•Largimin e politikës së përçarjes dhe krijimin e një klime më të hapur dhe demokratike.

Protesta e së premtes u nxit edhe nga një incident i rëndë që ndodhi të enjten në Beograd, kur një makinë shtetërore përplasi dhe plagosi rëndë një student protestues. Videoja e incidentit u përhap me shpejtësi në rrjetet sociale, duke shkaktuar zemërim të madh në publik.

Demonstratat në Serbi po shndërrohen në një valë të fuqishme pakënaqësie ndaj qeverisë, ndërsa qytetarët kërkojnë drejtësi dhe llogaridhënie për humbjet njerëzore dhe mungesën e sigurisë në vend.