Freetown, Sierra Leone – Qeveria e Sierra Leone ka thirrur urgjent ambasadorin e saj në Guinea, Alimamy Bangura, pas gjetjes së shtatë valixheve me substanca të dyshuara si kokainë në një automjet të ambasadës.

Automjeti u konfiskua nga autoritetet guineane, ndërsa pasagjerët u arrestuan me dyshimin për trafik droge. Ministri i Jashtëm i Sierra Leone, Alhaji Musa Timothy Kabba, konfirmoi se ambasadori nuk ishte në makinën e ndaluar dhe nuk është nën arrest, por është thirrur për të dhënë një raport të plotë mbi ngjarjen.

Përveç shtatë valixheve, autoritetet gjetën rreth 2,000 dollarë cash, por pesha e drogës së dyshuar nuk është specifikuar ende. Ministri Kabba theksoi se nuk ka prova që ambasadori të jetë i përfshirë në këtë aktivitet kriminal.

Ky skandal ka ngritur alarmin mbi trafikun e kokainës në Afrikën Perëndimore, e cila mbetet një pikë kyçe për transportimin e lëndëve narkotike nga Amerika Latine drejt Europës. Muajin e kaluar, Presidenti i Sierra Leone, Julius Maada Bio, shpalli përdorimin e drogave si një emergjencë kombëtare, duke theksuar rritjen e konsumit të substancave të rrezikshme në vend.

Autoritetet guineane dhe ato të Sierra Leone kanë nisur një hetim të thelluar për të zbardhur të gjithë rrjetin e mundshëm pas këtij trafiku ndërkombëtar droge.