Porto Velho, kryeqyteti i shtetit Rondonia në Brazilin perëndimor, është përfshirë nga një valë dhune mes bandave kriminale dhe forcave të sigurisë, duke shkaktuar 13 viktima në katër ditët e fundit.

Sipas raportimeve nga shërbimet e sigurisë në Rondonia, tetë persona janë vrarë në sulmet e bandave, ndërsa pesë të tjerë kanë humbur jetën gjatë përleshjeve me policinë, që prej mëngjesit të së martës.

Në një akt të hapur hakmarrjeje ndaj operacioneve të policisë, bandat i kanë vënë flakën 20 autobusëve, përfshirë edhe mjete të transportit shkollor. Për këtë arsye, autoritetet kanë vendosur masa të rrepta sigurie, duke kufizuar lëvizjen e transportit publik, i cili tashmë shoqërohet nga forcat policore.

Situata mbetet e tensionuar, ndërsa forcat e sigurisë vazhdojnë operacionet për të rivendosur rendin dhe për të frenuar përshkallëzimin e dhunës.

🚨 Porto velho vira palco de violência por criminosos deixando 12 mortos e 20 pessoas hospitalizadas após confronto com a polícia 🚔 pic.twitter.com/G0UrN8eL1j

— Portal Tucuxi (@portaltucuxi) January 17, 2025