Sekretari i Përgjithshëm i Lëvizjes “Shqipëria Bëhet”, avokati Elton Laska, ishte i pranishëm në ceremoninë e inaugurimit të Presidentit të 47-të të Shteteve të Bashkuara të Amerikës, Donald Trump.

Pjesëmarrja e Laskës në këtë ngjarje historike nënvizon angazhimin e Lëvizjes “Shqipëria Bëhet” për të forcuar marrëdhëniet strategjike mes Shqipërisë dhe SHBA-së.

Në një deklaratë zyrtare, Lëvizja theksoi se partneriteti me Shtetet e Bashkuara është vendimtar për forcimin e demokracisë, zhvillimin ekonomik dhe sigurinë kombëtare të Shqipërisë.

“Ne besojmë se Shqipëria duhet të vazhdojë të ndërtojë ura bashkëpunimi me aleatin tonë më të rëndësishëm, SHBA-në. Pjesëmarrja në këtë event tregon përkushtimin tonë për të nxitur marrëdhënie të forta diplomatike dhe ekonomike me Amerikën,” u shpreh Laska.

Lëvizja “Shqipëria Bëhet” vijon të jetë aktive në ndërtimin e marrëdhënieve ndërkombëtare, duke synuar të sjellë më shumë investime dhe bashkëpunime strategjike në vend.