Lëvizja “Shqipëria Bëhet”, së bashku me aktivistë dhe qytetarë, zhvilloi dje një protestë për të kërkuar transparencë mbi rastin e punonjësit të policisë, Azbi Spahiu, i cili sipas raportimeve, tentoi vetëvrasjen për shkak të presionit psikologjik gjatë ushtrimit të detyrës.

Protesta nisi në Sheshin “Skënderbej” dhe vijoi me një marshim drejt Ministrisë së Brendshme, ku qytetarët iu bashkuan një tjetër grupimi që protestonte për të njëjtën çështje.

Lëvizja “Shqipëria Bëhet” ka bërë thirrje për një hetim të plotë dhe të pavarur mbi këtë rast, duke kërkuar që institucionet përgjegjëse të japin llogari dhe të sigurojnë një mjedis të drejtë dhe të sigurt për punonjësit e policisë.

Lëvizja ka deklaruar se do të vazhdojë të mbështesë çdo kauzë që lidhet me të drejtat e qytetarëve dhe transparencën institucionale, duke e konsideruar këtë një prioritet të pandërprerë në misionin e saj për një Shqipëri më të drejtë dhe më të ndershme.