Policia e Tiranës ka realizuar një operacion anti-droge, ku janë arrestuar dy persona dhe është shpallur në kërkim një i tretë. Operacioni i koduar “Interruption 2” ka çuar në pranga dy shtetas: Kujtim Ukaj, 35 vjeç, banues në Krujë, dhe Abdurrahman Rizvani, 26 vjeç, banues në Mat, ndërsa është shpallur në kërkim bashkëpunëtori i tyre, shtetasi S. D., 28 vjeç.

Sipas njoftimit nga autoritetet, arrestimet janë realizuar në Luz të Fushë Krujës, ku dy të arrestuarit po lëviznin me dy automjete. Gjatë kontrollit të automjetit të Kujtim Ukajt, në bagazh janë gjetur 6 thasë me kanabis sativa, me peshë totale 60 kilogramë. Automjeti tjetër drejtohej nga Abdurrahman Rizvani, i cili kishte rolin e kontrolluesit të rrugës dhe njoftonte Kujtim Ukajn nëse kishte prezencë të Policisë.

Droga është sekuestruar si provë materiale, bashkë me dy automjetet, dy celularët dhe një shumë parash. Materialet janë dorëzuar në Prokurorinë për veprime të mëtejshme lidhur me veprën penale “Prodhimi dhe shitja e narkotikëve”, kryer në bashkëpunim.