Arkëmorti me trupin e pajetë të Kryepeshkopit Anastas Janullatos ka mbërritur sot në Shqipëri, duke kaluar pikën kufitare të Kakavijës, ku u prit nga rreth 500 besimtarë, të cilët nderuan figurën e tij me lule dhe dafina.

Nga Kakavija, kortezhi është nisur drejt Gjirokastrës, ku do të mbahet një ceremoni përshpirtjeje, përpara se arkëmorti të transportohet për në Tiranë, ku do të vijojnë homazhet dhe ceremonia mortore.

Kryepeshkopi Anastas, një figurë e shquar fetare dhe humanitare, ka lënë një trashëgimi të rëndësishme në Ringritjen e Kishës Ortodokse Autoqefale të Shqipërisë, duke qenë një nga udhëheqësit shpirtërorë më me ndikim të shekullit të fundit.