Gjykata e Korçës ka vendosur masën e sigurisë “arrest në burg” për Aleks Ago, 45 vjeç, i cili akuzohet për ngacmim seksual ndaj një 15-vjeçari nga një fshat i Devollit.

Ngjarja u denoncua dy ditë më parë nga vetë i mituri, i cili, në prani të nënës dhe një psikologu, ka dëshmuar në Komisariatin e Devollit se 45-vjeçari e kishte prekur në mënyrë të papërshtatshme në disa pjesë të trupit.

Sipas dëshmisë së adoleshentit, ky ishte rasti i tretë ku i dyshuari kishte tentuar ta tërhiqte pas vetes, duke i ofruar edhe para.

Menjëherë pas denoncimit, policia arrestoi 45-vjeçarin, ndërsa Prokuroria kërkoi masën e arrestit me burg, e cila u miratua sot nga Gjykata e Korçës.

I dyshuari, banor i fshatit Kuç, bashkia Devoll, është i martuar dhe prind i tre fëmijëve. Hetimet vijojnë për të zbardhur plotësisht rrethanat e ngjarjes.