Tiranë – Policia e Tiranës ka dhënë detaje mbi ndarjen nga jeta të avokatit Gjovalin Ulndreaj, i cili ndërroi jetë në spital pasi humbi ndjenjat gjatë një seance gjyqësore në Gjykatën e Apelit.

Ngjarja ndodhi më 28 janar 2025, kur 59-vjeçari u rrëzua papritur gjatë seancës dhe u transportua menjëherë në spital për ndihmë mjekësore. Pavarësisht përpjekjeve të mjekëve, ai nuk arriti të mbijetojë.

Sipas informacioneve paraprake të policisë, dyshohet se vdekja ka ardhur si pasojë e një arresti kardio-respirator.

Kush ishte Gjovalin Ulndreaj?
Gjovalin Ulndreaj ka pasur një karrierë të gjatë në shërbim të ligjit. Deri në vitin 2003, ai ka ushtruar detyrën e oficerit të Policisë, ndërsa për më shumë se 22 vite ka qenë pjesë e sistemit të avokatisë, i licencuar pranë Dhomës së Avokatisë Shkodër.

Në vitin 2020, Ulndreaj kandidoi për të drejtuar Byronë Kombëtare të Hetimit, përkrah emrave të njohur si Ibrahim Disha, Artan Shkëmbi, Adriatik Ago dhe Sabri Hoxha.

Ngjarja ka shkaktuar trishtim në komunitetin e avokatëve dhe atyre që e kanë njohur nga afër, ndërsa hetimet vijojnë për të zbuluar më shumë rreth shkaqeve të vdekjes së tij.