Mbrëmjen e djeshme, janë regjistruar të shtëna me armë zjarri në fshatin Linaj, njësia administrative Gruemirë, në Bashkinë e Malësisë së Madhe. Dyshohet se ka pasur një shkëmbim zjarri mes dy personave, ndërsa policia ka reaguar menjëherë dhe është nisur drejt vendit të ngjarjes.

Ngjarja ka ardhur pas një incidenti të mëparshëm, kur mëngjesin e djeshëm, dy persona të maskuar, duke udhëtuar me motor, qëlluan me armë shotgun në drejtim të kamerave të sigurisë së banesës së familjes Kurtaj, në fshatin Gruemirë, dhe më pas u larguan drejt një zone malore. Pas disa orësh, ata u rikthyen, por këtë herë u përballën me tre djemtë e familjes Kurtaj, të cilët i pritën në rrugë me një automjet.

Ndjekja mes dy grupeve ka vazhduar për rreth 10 minuta, deri kur njëri prej autorëve u rrëzua nga motori, por arriti të largohej nëpër fushat e mbjella të fshatit. Policia e Malësisë së Madhe ka nisur një operacion për të identifikuar dhe kapur autorët, ndërsa të tre djemtë e familjes Kurtaj kanë deklaruar se nuk kanë dijeni për identitetin e agresorëve.