Gjykata e Posaçme Kundër Korrupsionit dhe Krimit të Organizuar (GJKKO) ka zbardhur detaje të reja nga hetimet për kryetarin e Bashkisë së Tiranës, Erion Veliaj, dhe familjarët e tij.

Sipas vendimit, rezulton se organizata “Harabel” e Ajola Xoxës financohej nga kompania e telekomunikacionit “ONE”, e cila përfitonte fonde publike nga Bashkia e Tiranës. Në të njëjtën kohë, kjo kompani ishte kliente e “Gogel” sh.p.k., në pronësi të Arbër Veliajt, vëllai i kryebashkiakut.

“Nga komunikimet gjithashtu rezulton se ‘Harabel’ financohet nga ‘ONE’, e cila përfiton fonde publike nga Bashkia e Tiranës. Kjo kompani është gjithashtu kliente e kompanisë ‘Gogel’ sh.p.k., që është në pronësi të Arbër Veliajt. Ky fakt evidentohet në komunikime ku përmendet lëshimi i faturave për një sponsorizim prej 5.000 eurosh nga ‘ONE’ për ‘Harabel’ dhe për një pagesë tjetër nga Albtelekom për OJF ‘BYL-A’,” thuhet në vendim.

Gjithashtu, në komunikime del se punonjësit e përfshirë në këto transaksione nuk kanë pasur qartësi mbi përshkrimin e pagesave në faturat e tyre, duke ngritur dyshime mbi transparencën e tyre.

Hetimet për Erion Veliajn dhe rrjetin e financimeve të lidhura me të vijojnë, ndërsa pritet të ketë zhvillime të tjera në ditët në vijim.