Tiranë – Pas një alarmi për bombë në shkollën private “Turgut Ozal”, institucioni arsimor ka konfirmuar se situata është nën kontroll dhe ka rezultuar se alarmi ishte i rremë. Përmes një njoftimi në rrjetet sociale, shkolla ka bërë me dije se ka bashkëpunuar ngushtë me Policinë e Shtetit dhe janë marrë të gjitha masat e nevojshme sipas protokolleve të sigurisë.

“Shkolla njofton të gjithë prindërit, nxënësit dhe dashamirët se situata është nën kontroll, e qetë dhe në bashkëpunim të plotë me Policinë e Shtetit. Janë marrë të gjitha masat e sigurisë sipas protokollit në raste emergjence, pavarësisht se lajmi rezultoi i rremë. Falënderojmë Policinë e Shtetit për gatishmërinë dhe profesionalizmin! Falënderojmë të gjithë stafin e shkollës si dhe prindërit tanë për korrektësinë dhe bashkëpunimin!”, thuhet në deklaratën e shkollës.

Alarmi për bombë u ngrit pasi një mësuese kujdestare u dërgoi një mesazh prindërve të nxënësve, duke i informuar se shkolla kishte marrë një email kërcënues dhe se fëmijët duhej të largoheshin për në shtëpi. Më pas, Policia e Tiranës sqaroi se rreth orës 11:30 kishte marrë një njoftim për një email në anglisht, ku thuhej se një bombë ishte vendosur në ambientet e shkollës dhe se do të shpërthente brenda 43 minutave.

Pas hetimeve dhe kontrolleve të imtësishme nga forcat e sigurisë, u konfirmua se kërcënimi ishte i rremë dhe se nuk kishte asnjë rrezik real për nxënësit dhe stafin e shkollës. Policia ka nisur një hetim për të identifikuar autorin e emailit dhe për të zbardhur rrethanat e ngjarjes.