Policia e Shkodrës ka parandalur një ngjarje të mundshme kriminale si pasojë e ndërhyrjes së menjëhershme të uniformave blu. Një konflikt ishte shpërthyer mes pronarit të një lokali, G. H., dhe disa shtetasve të tjerë në lagjen “Manush Alimani” të Shkodrës. Pas largimit të një prej agresorëve, ai është rikthyer në lokal me një armë zjarri kallashnikov, por falë veprimeve të shpejta të Policisë, u arrit neutralizimi dhe arrestimi i 54-vjeçarit, V. H., banues në Shkodër.

Në kuadër të operacionit policor “Reagimi”, u arrestua 54-vjeçari për veprat penale “Mbajtja pa leje dhe prodhimi i armëve, armëve shpërthyese dhe municionit” dhe “Kanosje”. Pas konstatimit të forcave të rendit, ai hodhi armën e zjarrit në tokë, ndërsa shërbimet e Policisë e arrestuan menjëherë dhe sekuestruan armën dhe municionin luftarak.

Po ashtu, është proceduar në gjendje të lirë pronari i lokalit, G. H., për veprat penale “Punësimi i paligjshëm” dhe “Fshehja e të ardhurave”. Materialet procedurale iu kaluan Prokurorisë së Shkodrës për veprime të mëtejshme.