Një ngjarje e rëndë ka ndodhur sot jashtë sallës së gjyqit në Gjermani, ku po vazhdon procesi për vrasjen e boksierit shqiptar, Besar Nimani. Gjatë një përleshjeje me armë zjarri, janë plagosur disa persona, përfshirë vëllain e Besar Nimanit, i cili ka marrë një plagë në këmbë, por ndodhet jashtë rrezikut për jetën.

Ngjarja e rëndë ka ndodhur pas përfundimit të seancës gjyqësore ndaj të akuzuarit, Huseyin Akkurt, i cili po gjykohet për vrasjen e boksierit shqiptar në marsin e vitit të kaluar. Sipas gazetës gjermane “Bild”, përveç vëllait të Nimanit, është plagosur edhe babai i të pandehurit, i cili ka marrë një plagë në kraharor dhe është në gjendje kritike.

Të shtënat kanë ndodhur rreth orës 13:30 dhe ka shkaktuar kaos dhe panik në ambientet përreth. Policia ka arrestuar një nga dy të dyshuarit për sulmin, ndërsa një tjetër person është ende në kërkim. Ky incident ka shtuar tensionet në procesin gjyqësor për vrasjen e Besar Nimanit, i cili po tërheq vëmendjen e medias dhe publikut për shkak të natyrës së dhunshme të ngjarjes dhe zhvillimeve të papritura që po shoqërojnë procesin.