Policia e Tiranës ka finalizuar operacionin policor të koduar “Finish”, duke arrestuar tre persona dhe shpallur në kërkim një tjetër për falsifikimin e certifikatave të mbrojtjes së gjuhëve të huaja.

Në kuadër të hetimeve intensive, u arrestuan shtetasit M. P. (62 vjeç), O. J. (43 vjeç) dhe E. Y. (42 vjeç). Gjithashtu, u nisi procedimi penal për shtetasen B. N. (24 vjeçe) dhe u shpall në kërkim shtetasja E. A. (34 vjeçe).

Grupi hetimor ka zbuluar se këta shtetas, në bashkëpunim me njëri-tjetrin, falsifikonin certifikata të mbrojtjes së gjuhëve të huaja, të cilat i shisnin kundrejt pagesave që varionin nga 20,000 deri në 30,000 lekë të rinj. Këto certifikata përdoren nga shtetas të ndryshëm në institucionet arsimore.

Gjatë kontrollit në ambientin e përshtatur për këtë veprimtari të kundërligjshme, të cilin e kishte në përdorim njëri prej të arrestuarve, policia ka gjetur dhe sekuestruar 35 certifikata të falsifikuara, 1200 euro, një shumë lekësh, 4 celularë dhe një njësi kompjuterike të përdorur për përgatitjen e certifikatave false.

Materialet procedurale iu referuan Prokurorisë për veprat penale “Falsifikimi i dokumenteve” dhe “Fshehja e të ardhurave”.