Detaje të reja kanë dalë në dritë nga vrasja e një 24-vjeçareje të huaj, e identifikuar si Rayyan Alwan, ngjarje e ndodhur në rrugën “Gjon Muzaka” në Tiranë. Viktima, me origjinë nga Palestina, dyshohet se është vrarë nga bashkëshorti i saj, Fadi Alwan, më 22 shkurt, ndërsa ngjarja u zbulua vetëm sot.

Sipas hetimeve paraprake, 49-vjeçari Alwan është larguar nga apartamenti në rrugën e Kavajës të shtunën e 22 shkurtit, ku u filmua duke marrë një taksi në drejtim të aeroportit të Rinasit. Ai më pas ka udhëtuar drejt Greqisë, vend ku dyshohet se mund të jetë strehuar.

Të dhënat e hetimit: Vrasja mund të ketë qenë e planifikuar

Burime nga Prokuroria dyshojnë se 49-vjeçari ka zgjedhur Shqipërinë si vendin ku do të realizonte vrasjen e bashkëshortes së tij. Çifti, i cili prej vitesh jetonte në Gjermani, kishte dokumente greke, ndërsa në Shqipëri ishin prezantuar si turistë. Pronari i banesës ka treguar se ata komunikonin në gjuhën arabe dhe nuk ishin rezidentë afatgjatë në vend.

Trupi i pajetë i Rayyan Alwan u gjet me shenja dhune dhe plagë me thikë në pjesën e barkut, ndërsa ishte pronarja e apartamentit ajo që zbuloi trupin dhe njoftoi policinë.

Policia shqiptare në kontakt me autoritetet greke

Policia e Shtetit ka nisur gjurmimin e autorit të dyshuar, duke bashkëpunuar me autoritetet greke për të mundësuar arrestimin e tij. Ndërkohë, pas përfundimit të ekspertizës mjeko-ligjore, autoritetet do të kontaktojnë familjarët e viktimës për tërheqjen e trupit të pajetë.

Motivi i krimit mbetet ende i paqartë, ndërsa hetimet vijojnë për të zbuluar rrethanat e plota të kësaj ngjarjeje tragjike.